حشيش.. بيرة.. يسكر

اموال.. امال.. طموحات.. يرتشي

لا يؤدي عمله بالشكل المطلوب.. مديره يوبخه.. يشتمه قائلا "يابن الجزمة"

يتنصت على المكالمات الهاتفية.. يحب فتاة.. يتجسس عليها

يحبها اكثر..يراقبها.. يطاردها

يقابلها.. يكذب عليها.. يخدعها

يقابل والدها.. يصرخ في وجهة "حمرا"

حشاش.. سكير.. لسانه طويل على الكبير و الصغير.. مرتشي.. متلصص..كذاب

وكانت مكافأته في النهاية.. نور



وبيقولك السينما اليومين دول نظيفة.. بتحافظ على الاخلاق ومفيهاش بوس

لسة شايف الفيلم العيد اللي فات.. متشوفوش وحش

الفيلم كله رسائل غير مباشرة تودي في داهية.. تبقى قاعد بتتفرج وبتضحك ومش واخد بالك من الحاجات الصغيرة اللي بتتراكم جوا دماغك وبتأثر على افكارك و افعالك بعد كده

بيسموها
subliminal messages
معرفش اذا كان لها مرادف بالعربي ولا لأ.. ولو اني مفتكرش

ربط الحشيش و البيرة و الشتيمة والكذب، بالحب و الضحك والدم الخفيف.. هيحصل جواك وانت مش واخد بالك.. او واخد بالك ومطنش عشان انت عايز تتبسط ومش طالبة نكد

والاخطر مقولة ان السينما اصبحت نظيفة لان مفيهاش بوس ومفيهاش رقاصة.. تتفرج على الفيلم وانت مش مدي خوانة.. مهو فيلم نظيف لا بوس ولا عري ولا رقاصات.. فيلم لا يخدش حياء الاسرة ولا خوف منه على المراهقين

بكرة الممثلين يقولوا اننا مش بنسكر الا في سياق الدراما

مش بعيد يكونوا قالوها فعلا.. مانا اللي مغيب اصلا ولسة شايف الفيلم