شعور غريب ..
حبه شجن على شوية ذكريات يمكن كوكتيل من الحاجات الحلوة يعني ..
مش عارف فعلاً ..
انا شخصياً مش عارف ليه فتحت المدونة دلوقتى عشان اكتب ..
بس حاسس اني عاوز اكتب وخلاص ..
حتى اني مش لاقي عنوان للتدوينة فعلاً ..
لأول مرة من مدة طويلة جداً احن لذكريات الماضي ..
مش عارف ليه بس كانت ايام مافيهاش هموم ..
وعلى رأي محمد زكي كان اكبر همومنا فى الحياه الصحيان بدري عشان نروح المدرسة ..
فعلاً .. دا كان اكبر هم ..
بس بمجرد ما بتوصل المدرسة الاحساس دا بيروح بالتدريج ..
لما تندمج مع اصحابك .. وتقعد مستنى حصة الالعاب والفسحة عشان تنزلوا تجروا ..
وتفتكر برضه يوم التحضير للإذاعة المدرسية ..
كان دايماً يوم الاربع ..
وكنت دايماً بقول حكمة اليوم ..
والله يعنى قمة السخرية ..
فضلت تلت سنين من عمري اقول حكمة اليوم كل يوم اربع لمدة 8 شهور تقريباً ..
والله الواحد استفاد ..
يمكن لما حد بيسأله بيقول كلمتين حلوين كدا ..
يعرف يعمل حاجة ..
بس مع نفسه .. مش بيعرف يقولها اي كلمة .. سواء حكمة او حتى نكته ..
وافتكر يوم مسابقة المدارس برضه كان يوم جامد ..
كنت رايح انا واحمد عبدالفتاح واحمد راضي وهيثم ..
اربعة من كل مدرسة ..
اخدنا المركز التاني ..
كان فى بنت فى مدرسة الزهراء اللى اخدت المركز الاول .. ينطبق عليها طلب علاء ولي الدين فى فيلم الناظر ” حد يقتل البت دي ” ..
كانت فظيعة ..
علم وثقافة وادب واخلاق وفوق دا كله جمال ..
طبعاً عرفت دا كله فى الساعتين وفى الحفلة اللى فى الاخر ..
ماعلينا ..
وبرضه يوم المصارعة ..
كانت المدرسة عندنا بيطلعوا الطلبة اللى فى خامسة ابتدائي مصارعة روماني ..
بس الوزن وكدا .. وانا صغير كنت تقيل كدا ومبقلظ ..
اخدوني فى اللعبة ..
والماتش كان على اشده ..
وفى النهاية طبعاً ..
خسرت ..
حاجات حلوة خالص والله ..
الواحد فعلاً مفتقد الايام دي ..
وفي يوم وانا بحيي العلم فى مرة لاني اتهبلت واشتركت فى الشرطة المدرسية .. قولت التحية مرتين بدل تلاته ..
وطبعاً دا كان يوم مسخرة ..
فضلت تسلية الفصل طول اليوم ..
بس عرفت اخد حقى بعد كدا:D ..
ياخبر ابيضضض ..
دا الواحد لو كتب من هنا لبكرة مش حيكفي ..
طيب انا تقريباً حفتح قسم لمذكراتي القابلة للنشر كدا ..
يلا بقى كفاية لحد هنا ..
سلام ,,

———–
ملحوظة: انا لقيت اسم للتدوينة ..
يارب يعجبكم بقى