بما اني مش فاضي وقولت استنى شوية على التصميم الجديد عشان الوقت .. فقررت انى اكمل بلوجينج لحد ما انزل التصميم الجديد
اولاً احداث كتير حصلت الفترة اللى فاتت حتكلم عنها بالتفصيل واحدة واحدة
ثانياً النهاردة لقيت محمد الشافعي باعتلي لينك جامد جداً .. اللينك دا موقع نادين
مين نادين دي بقى ؟!!
نادين دي لو تفتكروا البنت اللبنانية الشقية اللى غنت فولا بالومبيلا فى يوم من الأيام
طبعاً ربنا يكرمها دلوقتى بقت عروسة وحلوة اوي يعنى وعندها 28 سنة 
بس مش دا الموضوع
الموضوع اني افتكرت شوية حاجات بمجرد انى سمعت الاغنية
افتكرت انها كانت بتيجي على القناة الأولى كل يوم جمعة الصبح فى فقرة الأطفال هي واغنية كوكو واوا
افتكرت ايام الواحد فيها ماكانش فارقة معاه اي حاجة .. عيل صغير اهبل ما بيعملش حاجة غير انه ينام الساعه 8 بالليل عشان يصحى 6 الصبح يروح المدرسة 7 ..
ويقعد يقرا قصص ويتفرج على التلفزيون ..
ايام ..
طبعاً ومما لاشك فيه يعنى ( حلو البق دا ) ان كل واحد حيقرا البلوج دي حيفتكر الايام دي ..
ياريت بقى ترد وتقولنا كنت بتعمل ايه فى الأيام دي ؟
الذكريات ..
وياسلام لو تفتح تدوينة فى مدونتك وتكتب عن الذكريات ..
حتبقى حاجة جميلة جداً
اسيبكم بقى مع الاغنية
كُتب في:
ذكريات, روقان, فولا فولا| |
