انا ماقريتش عطيل كاملة قبل كدة خالص .. قريت ملخص ممتاز ليها , وانا فى أولى ثانوى أو ثانية ثانوى .. بس هو فيه حاجة اسمها “ملخص ممتاز” لعمل أدبى !! .. بلاش ملخص ممتاز .. ملخص وخلاص .. بس هى مش جذبتنى اوى فى وقتها مش عارف ليه .. سواء قبل ما اقرا الملخص دة أو بعد ما قريته .. بس على أي حال عطيل (othello) جميلة طبعاً .. ان انسان برئ يموت بسبب براءته ونقاء سريرته , وكمان يموت بأيد أقرب الناس ليه دة شىء مش سهل .. لما شيطان يستغل براءة انسان , وغباء , وغيرة , وتسرع , وحمق انسان اخر , ويدمج الاتنين ببعض عشان يعمل مأساة ؛ دة شىء مش سهل .. حصل وبيحصل وهيحصل كتير بس مش سهل .. وبرضة فكرة التطرف فى الحب لدرجة تعمى البصر والبصيرة .. وفكرة “احذر عدوك مرة وصديقك ألف مرة” …

من حوالى 4 أو 5 سنين بالظبط شفت فيلم (othello) بتاع (لورنس فيشبرن) أو (مورفيوس) فى سلسلة أفلام ماتريكس .. الفيلم شدنى من أول نظرة .. فيه فيلم تحس أنك لازم تسيب اللى فى ايدك , وتقعد تتفرج عليه , ودة كان من النوعية دى .. الفيلم شدنى من مكانى ودمجنى دمج فى أحداثه .. فى أربع شخصيات محورية هما اللى فاكرهم سواء من الفيلم أو من عطيل نفسها .. عطيل , وديدمونة (أو ديزدمونة) , وياجو (Iago) , وكاسيو …

كاسيو مش فاكر عنه غير انه كان نموذج لمصطلح “شخص طيب ومخلص”

أما ديدمونة زوجة عطيل فهى نموذج للطهر المجسم .. المادة الخام للبراءة والسذاجة .. لما ييجى اسمها على ذهنى بفتكرلها مشهد فى الفيلم , وهى بتتكلم مع إميليا (زوجة ياجو) عن الخيانة الزوجية , ومش فاهمة يعنى ايه مصطلح “خيانة زوجية” .. مش مش فاهمة .. بس مش قادرة تستوعب ان ازاى زوجة تخون زوجها .. ومن كتر عدم استيعابها لدة ؛ كانت متصورة أنه شىء خرافى لا يمكن يحصل .. كانت الخيانة الزوجية بالنسبة ليها حاجة خيالية ماحصلتش فى تاريخ الانسانية أو لا يمكن تتخيل حدوثها .

عطيل نفسه كان نموذج للقوة لما تقترن بالحُمق .. شخص قوى وطيب وجواه طفل طايش بيبحب بجنون .. مش بيتوقع الشر من محدثه .. على الرغم من انه قوى لكن سهل التأثير عليه .. سهل خداعه .. وانا بتفرج على الفيلم كنت بحاول أفهم شخصيته .. عطيل كانت عنده أزمة ثقة بالنفس رهيبة هى اللي كانت وقود لغيرته اللى أشعله (ياجو) .. عطيل كان مغربى أسود , وديدمونة كانت الجمال ذاته .. هل عطيل ماكنش مصدق أنه ديدمونة ممكن تحبه؟؟ .. هما الاتنين كانوا بيحبوا بعض جداً .. لكن كان فيه شىء فى عطيل مش مصدق أن رمز الجمال ممكن يحب مغربى أسود أو شيطان أسود زى ما كان ياجو بيقول .. لكن ديدمونة نفسها جردت عطيل من وجهه القبيح , وشافت جواه أجمل انسان , وأجمل حبيب .

نيجى بقة ل (ياجو) .. تركبية بشرية عجيبة .. الايقاع بين الاحباب هويته المفضلة .. الكذب حرفته .. حقير ودنىء وحقود لدرجة لاتوصف .. وفوق دة كله أستاااااذ فى فهم طبائع النفوس .. عينه بترصد بكل سهولة مواطن الضعف فى الشخص اللى قدامه عشان يقدر يضربه فيها بكل سهولة , وبكل قوة .. ياجو رصد بعينه نقاط الضعف فى عطيل , وديدمونة , وكاسيو .. حلل شخصية كل واحد فيهم بكل دقة .. عطيل قوى مخلص غيووووووووور أحمق , ولما بيحب بيحب بعبط , ومش واثق فى نفسه .. كاسيو مخلص طيب ساذج أبله .. ديدمونة عفيفة شريفة بريئة سااااااااااااااااذجة جداً وبتحب عطيل بإخلاص .. وبدأ ينسج الشر بصوابعه فى أنقى صوره .. شر نقى .. شر بيوووووور أوى …

فيه أسلوبين فى الأفلام بحبهم جداً .. الاسلوب الأول ان الممثل يحكى وتسمع صوته فى بعض أحداث الفيلم من وقت للتانى .. الاسلوب دة بحبه جدا .. زى فيلم أرض الخوف بتاع أحمد زكى أو الفيلم المذهل اللى بموت فيها كازينو , ولو لقيت فيلم أى فيلم بالشكل دة بتجذب له كالمسحوووور .. الاسلوب التانى أن الممثل من وقت لأخر ينفصل عن اطار الفيلم , ويوجه كلامه لك مباشرة .. يبص فى عمق عينك , ويوجه كلامك لك بدون حواجز .. كأنه قاعد معاك .. كأنه بيبص فى مراية .. كأنه مش بيمثل فيلم .. بيوجهلك أنت المشاهد كلامه بشكل مباشر .. مش مجرد انه بيكلم نفسه , دة بيكلمك انت .. أنا مش عارف اذا كان الاسلوبين دول فعلا اساليب ليها أسماء فى عالم السينما والا لأ , وياريت لو حد يعرف أنه ليهم اسماء ومصطلحات معينة يبقى يقولنا فى التعليقات…

فيلم عطيل من النوع التانى .. ياجو بيشرحلك بمنتهى الدقة ازاى بينسج الشر .. ازاى بيبتسم بمنتهى الاخلاص , ومن جواة بيخطط تخطيط محكم للقضاء على حياة عطيل وديدمونة وكاسيو .. فى أحد مشاهد الفيلم دة , ياجو هيبص فى عينك .. فى أعماقك من جوة , ويقول جملة مانسيتش مضمونها على الرغم من انى شفت الفيلم دة من زمان

عندما يزين الشياطين الغواية للبشر , فأنهم دائما ما يلبسونها ثوب السماء

هى الجملة مش كدة .. بس دة معناها ومضمونها اللى استقر فى ذاكرتى .. فيه جمل لما تسمعها تحس أنها بتضرب فى قلبك مباشرة .. والجملة دى كانت من النوع دة .. سنين ومانسيتش الجملة دى , وبفتكرها من وقت للتانى لما تثير مواقف الحياة مستقرها فى عقلى .. معنى الجملة دى بالنسبة ليا عشان ممكن كل واحد يفهمها بطريقة مختلفة , أن الشيطان سواء شيطان انس او شيطان جن لما يحب يضحك عليك , ويغويك , وينزلك فى أعماق أعماق بئر الراذئل , بيجتهد فى اقناعك فى البداية أن الأمر دة جاى من فوق ؛ عشان تتطمئن وتكمل فى طريق الخطايا والآثام .. يقنعك بشتى السبل والطرق أن الأمر دة عادى ومفيش منه مشكلة , وانه امر سماوى …

ايه المشكلة يعنى لو اخدت رشوة .. ايه اللى هيحصل يعنى !! .. دة نظير خدمة .. دى اكرامية لمجهوداتك .. مش دة أحسن ما عيالك مش يلاقوا اكل ويموتوا من الجوع .. وبعدين ما كله كدة .. يعنى كله غلط وانت اللى صح .. ولادك دول مش مسئولية عليك هتتحاسب عليها .. وبعدين مش لازم تربى عيالك دول كويس عشان يدعولك لما تموت .. ويبدأ يرتشى , وتجرى العجلة , ونيته السيئة اللى بدأ بيها عهد الرشوة تتطور , وتزداد سوء على سوء .. و”الورم الخبيث يبدأ بمللي .. يتوسع يتوسع من غير ما تحس , وتصبح له السيطرة , ويصبح الانحراف متعة , والشر مزاج , والسرقة كيف , والسلطة إدمان بدأت مظلوم أصبحت ظالم” زى ما بيقول أحمد زكى فى معالى الوزير …

أو فى لجنة امتحان مثلا تلاقيه بيقول غششش غششش , عارف لو مش غشيت ايه اللى هيحصل , هتسقطططط , ولو سقطت ابوك وامك هيتقهروا .. ابوك عيااااااااااان , وممكن يموت لو عرف انك سقطت .. غشششش .. لو ابوك مات هتشيييييييل ذنبه .. غشششش .. هتبقى اتسببت فى موت ابوك وشوف بقة يا حلو دى عقابها ايه عند ربنا .. غشششش .. الغش مش حرام .. بجد مش حرام .. الحرام انك تسقط .. ويبدأ عهد الغش فى أول سنة فى الكلية .. وعلى اخر سنة فى الكلية يكون احترف فن الغش ويطلع غشاااااااش جاهز . دى تقنيات شياطين الجن إما عن تقنيات شياطين الانس فى الاغواء فحدث ولاحرج .

هو دة معنى الجملة دى عندى .. المثالين اللى فوق دول ممكن يكونوا أمثلة ساذجة شوية عن معنى الغواية لكن أنا بحاول أوصل تصور “لتعريف” الجملة عندى …

ولأن الجملة دى مش ناسيها , فقلت من اسبوعين كدة لما أدور على نصها الأصلى فى الفيلم والمسرحية .. فنزلت الترجمة الانجليزى بتاعة الفيلم من صب سين .. وبحثت عنها فى الحوار .. عملت سيرش عن كلمة ((devils فى نص الحوار بتاع الفيلم لغاية ما لقيتها

When devils will the blackest sins put on, They do suggest at first with heavenly shows, As I do now: for whiles this honest fool Plies Desdemona to repair his fortunes And she for him pleads strongly to the Moor, I’ll pour this pestilence into his ear, That she repeals him for her body’s lust; And by how much she strives to do him good, She shall undo her credit with the Moor. So will I turn her virtue into pitch, And out of her own goodness make the net That shall enmesh them all

وبعد شوية من البحث على النت , عرفت مكانها فى المسرحية .. فى المشهد الثالث من الفصل الثانى فى مسرحية عطيل

ودة تعريب خليل مطران

متى أراد الزبانية الإيعاز بأشنع الخطايا صوّروها فى المبدأ بأبدع الصور السماوية كما أفعل الآن , لأنه بينما ذلك الأبله سليم الطوية يسعى لدى ديدمونة لاستعادة مكانته , وبينما هى تشفع له عند المغربى بقوة , أدس أنا فى أذن عطيل سُم الريب فى حقها بما أدخله على قلبه من أن رقتها لكاسيو ليست عن مبرة ولكن عن شغف أثيم. بقدر ما تزداد إلحاحا فى التماس الرأفة له يزداد تأييدها لسوء الظن بها عند المغربى وهكذا آخذها فى فخ فضيلتها واستخرج من مروءتها الفخ الذى أوقعهم فيه جميعاً

بس كدة , هو المفروض اقف هنا لأن الهدف من البوست كله انى اشارككم بالاقتباس اللى عجبنى كتير .. بس كان لازم التحوير اللى فوق دة كله عشان أوصلكم المشهد المحيط بالجملة دى.

وشكرا أنك استحملت ووصلت لغاية هنا .. خدلك بقة حاجة حلوة من التلاجة

سلامات