هل أنا الوحيد اللي لما يسمع كلمة "محتاجالك" في أغنية بيتوقع إن الكلمة اللجاية اللي هتوزن السجع هي "مشتاقالك"، و يلاقيها فعلا "مشتقالك"؟
هل أنا الوحيد اللي مستغرب إن نادرا ما تيجي أغنية مافيهاش واحدة من تصريفات الجملة ديه "تعالى يا حبيبي" فيغيروها و تبقى "يا حبيبي تعالى" أو "تعالالي يا حبيبي" إلخ….
هل أنا الوحيد اللي زهق من إن كل الأغاني عن الحب بس؟ و إزاي القلب "متشوق"، و "حيران"، و "مابينمش الليل" و "محتاجك تضميه"؟
و أسأل نفسي سؤال، هو السوبر ماركت بتاع الشعراء، ماعندوش إلا الكام كلمة دول؟ و هل ده الكلام اللي بيتقال فعلا بين الحبيبة اليومين دول؟ يعني فيه حد بيقول لصاحبته، "رموشك جراحة"؟ أو "ضميني بعنيكي"؟ أو "طولتي الغياب عليا"؟
أعتقد الكلام بين الحبيبة دلوقتي متجه أكثر، لكلام زي، "ماتشحينيلي كارت بخمسة"، أو "إحنا لازم نقعد في كافيه مافيهوش مينيمام"، أو إقناع دائم بالزواج العرفي، أو بإن العمليات إياها بقت تقريبا ببلاش.
معظم الشعرا بيقولوا إنهم بيكتبوا الكلام ده و بيتباع عشان الناس عايزة كده و لسة بيشتروا و مش هيشتروا غيره، طب هو مش ممكن يكونوا بيشتروه عشان ليس لديهم إختيارات أخرى؟
ليه إختصر الكلام المختلف على محمد منير ساعات، و محمود العسيلي ساعات، و بعض فرق الساقية اللي بتنحت في الصخر؟
هو إحنا شعب غبي لا سمح الله؟ و لا الفنانين بتوعنا هما اللي عندهم كام جملة في الدرج، و في كل أغنية بيوصلوا الجمل بشكل مختلف و خلاص؟
أنا لازم يعني أعمل فيها خواجة و أسمع إنجليزي بس عشان أسمع كلام جديد؟ طبعا هما أغاني البوب عندهم فيها أنيل من عندنا، بس برضة في ملايين الفنانين اللي بيغنوا كلام مبتكر كل يوم، حتى لو عن الحب، بيحكي تجارب شخصية حقيقية، أو بيألف مواقف مبتكرة، و بيحكي عن العلاقات من خلال تفاصيل بسيطة جدا.
و فيه حاجة ثانية المفروض نقف عندها كثير، ليه هناك معظم المغنيين بيألفوا و يلحنوا لنفسهم و هنا لأ؟ ليه المغني عندنا لا بيألف و لا بيلحن؟ هل لإن معظمهم ماكملوش تعليمهم في مدرسة الحياة، و ماعندهومش حاجة يقولوها، و هما مجرد حنجرة و مشاعر مزيفة؟ و بيدوروا بس على "الغنوة البياعة اللي بتاكل مع الناس"؟ ليه مش بيطوروا نفسهم و يتعلموا آلات موسيقية أو يتعلموا إزاي يكتبوا، عشان كل واحد يطلع من الي جواه شوية.
ليه ماعدناش أغنية عن كل موضوع في الدنيا؟ ليه هناك (مايكل جاكسون) و (بوب ديلين) نجحوا النجاح الرهيب ده و هم معظم كلامهم إجتماعي أو فلسفي جدا و قليل لما تلاقيلهم أغنية حب؟ ليه دلوقتي (جون ماير) و (جاسن مراز) مكسرين الدنيا في العالم و هما بتكلموا عن كل حاجة، و حتى لما بيتكلموا عن الحب بيحكوا مواقف حصلتلهم بجد معظمها، بيكتبوا لنفسهم و بيلحنوا لنفسهم معظم أغانيهم، أو على الناحية الثانية الهيب هوب اللي كلامه كلام الشوارع و النواصي.
و ليه هناك عندهم مليون نوع موسيقى، و إحنا عندنا إثنين بس؟ "عادة" و "شعبي" – شعبي بكسر الشاء – ، و العادة معظمه الإيقاع المقسوم اللي طلع من أوائل التسعينات، هو هواه، قص و لزق تقريبا بقاله عشرين سنة، و الأوكورديون إياه، أو الأغاني "الدراما" كما يطلق عيها نصف المطربين و النصف الآخر يقول عليها “إزلو" -قصده slow –، و بتبقى مهرية كمنجات بنفس الطريقة يا إما ناي بشكل مبتزل.
و ليه كل بوسترات الشرايط و السيديهات عليها صورت "المطرب"؟ ليه مافيش أفكار للبوستر أبدا؟ ليه لازم أشفها أو أشوفه مهري مكياج و لابس لبس مقزز بيحاول يكون "إزتايل"؟ هل لإن الألبوم فعلا مش عن حاجة معينة غير مجموعة أغاني بتحاول ترضي جميع الأزواق؟
و لما تلاقي حد عندنا حد بيحاول يختلف تلاقيه في معظم الأحيان يا عيني نص صوت و نادرا لو شكله مشرف ينفع يبقى نجم.
ماعادا طبعا قلة و هما دول اللي نفسي فعلا ينجحوا و يلاقوا فرص وسط أغاني القنوات و الإذاعات الجميلة بتاعتنا.
أنا بكره الناس المتشائمين اللي شايفين بره أحسن من جوا في كل حاجة، أو اللي مقتنعين إن زمان أحسن من دلوقتي و فين أيام درويش و الحامولي، و بكره أكثر منهم اللي مقتنعين إن جمهورنا غبي و مش عايز يتطور، أي جمهور في الدنيا متقبل للتغيير لو التغيير حلو و معمول صح، و هيأثر فيهم و هيفاجئهم، و فيه أمثلة قليلة حصلت قريب كانت كده، أينعم مش هتنجح أكثر من أبو شعر في صدره، أو من الثاني اللي عنده سبعين سنة و شكله عشرين بإسم الله ماشاء الله، بس هيبقى ليك جمهور ثاني بيقدرك و وفي ليك و لفنك أكثر.
أتمنى من كل المغنيين المصريين و القائمين على صناعة الموسيقى أن يجددوا، يبقى عندهم ضمير، مايسرقوش من بره الأغاني، بس يقلدوهم في تفانيهم لفنهم و في تنوعهم، يحترموا الجمهور، و يحترموني، عشان أحترمهم.
| |
|
