الاستعداد ليوم بور سعيد
بدا من يوم الاتنين
لما قابلت فاعلة خير من خارج الوسط التدوينى
تبرعت بمبلغ مالى
وطلبت منى انى
اشتري متطلبات المعاقين من تلفزيون وبامبرز وخلافه
ولما قلتلها احتمال انى ماروحش بور سعيد
وانى لو اشتريت الحاجات هابعتها مع عسقول
قالتلى خلاص لو مش هاتسافرى
اشترى الحاجات الخفيفة من هنا وابعتيها مع عسقول
وابعتى باقى الفلوس مع عسقول
وهو وايناس يشتروا التلفزيون والبامبرز من بور سعيد
ولما قلت لعسقول انى مش جاية بور سعيد
طلب منى الحضور
وقال على وجهة نظره فى مسالة حضورى
ورأيه اقنعنى بصراحة
وبدات رحلة شراء الطلبات على يومين
يوم التلات نزلت انا وشاهى ودعاء
اشترينا الحاجات السهل حملها
وخدنا فكرة عن اسعار التلفزيونات
ويوم الاربعاء طلبت من حمادة السواق
يجى معايا هايبر
علشان نشترى التلفزيون
ويحطه عنده فى عربيته
حمادة حاول يحط التلفزيون بكرتونته
فى شنطة العربية
منفعش
فحاول انه يحطه بكرتونته على الكنبة
منفعش
راح مقلعه كرتونته
وحاول يحطه جوة الشنطة مانفعش
راح حطه على الكنبة من غير الكرتونة اللعينة
طبعا مع اهتزازات العربية وهى ماشية
التلفزيون كان بيتمرجح
سالت حمادة
هو احنا لما نسافر بور سعيد
هافضل طول اليوم ساندة التلفزيون بايدى؟
قالى ماتخافيش
لما يجى يوم الجمعة
هتلاقى كل حاجة متظبطة
سالته مافيش امل التلفزيون يتحط فى الشنطة بعد كدة
قاللى لا ما ينفعش
وساعتها عرفت ان ماينفعش حد يركب معايا العربية
غير شخص واحد فقط
الا وهو عسقول
لأنى كنت متفقة معاه من بدرى اننا هانروح سوا
وطبعا ما قلتش لضياء انى مسافرة
لانى اتكسفت اقوله انى مسافرة مع حمادة
وان مالهوش مكان معانا فى العربية واحنا رايحين
اليوم الموعود
اليوم بدأ معايا الساعة سبعة صباحا
لما لاقيت رنة على موبايلي من حمادة السواق
معناها انه جه تحت البيت
وفى انتظار نزولى انا وشريف
نزلت فعلا ولا قيت حمادة
مقعد التلفزيون وراه على الكنبة
وملبسه حزام الامان
قعدت جنب التلفزيون
وشريف ابنى قعد قدام
والساعة تمانية وعشرة
كنا تحت بيت عسقول
وحصل عملية انتقال لشريف
وجه قعد جنبى
وعسقول قعد قدام جنب حمادة
الساعة تمانية وتلت كنت تحت البيت عند ماما
طلعت خدت من عندها البامبرز
لانه كان من ضمن متطلبات المعاقين
وفاعلة الخير كلفتنى انى اشتريه
وانا بدورى كلفت ماما انها تشتريه من الصيدلية اللى جنبها
وبعد كدة رحنا لاقرب مطعم
ضربنا ساندوتشات الفول والطعمية
ومسكنا طريق السفر فى حدود الساعة تسعة
وصلنا بور سعيد الساعة حداشر الا عشرة تقريبا
استقبلتنا ايناس
ودخلنا حديقة التاريخ
قابلت سارة
ونسمة وماما امولة
وبعض الاطفال
وصديقتين لنسمة
بدانا اليوم باللعب مع الاطفال اللى كانوا موجودين
ونفخنا البلالين
وشريف انطلق مع طفل اسمه صلاح
وقعدا يلعبوا سوا
انا وعسقول اتناقشنا حول اهداف الجمعية الشرانية
اللى احنا بصدد اننا ننشئها
واتفقنا على المبدا الاساسى اللى هاتقوم عليه اهداف الجمعية
وطبعا محدش منكم يعرف ايه هى الجمعية الشرانية
غير اللى راحوا الحسين بعد التبرع بالدم
ولنا فى هذه الجمعية الشرانية بوست اخر
بعد كدة توالى حضور باقى المدونين من القاهرة
ودمياط وبور سعيد
الدى جى
جه بعد الصلاة
اتفرجنا على جزء من العرض بتاعه
وبعد كدة استاذنت من ايناس
انى اروح انا وشريف وعسقول وحمادة السواق
نروح نتمشى على البحر شوية ونرجع تانى
علشان خاطر كنت وعدت شريف انى اوريه البحر
وهى مشكورة وافقت
وبالفعل اتمشينا على رصيف عريض
اسمه الممشى السياحى
وكان على يمينا قناة السويس
لكن الرصيف كان بيفصل قناة السويس بسور حديدى
وطبعا شريف ما اقتنعش ان هو ده البحر اللى عايز يشوفه
وقالى يا مامى انا عايز اروح عند البحر اللى عنده رملة
فحمادة قالنا خلاص تعالوا نرجع ناخد العربية واوديكم
ولكن فى طريقنا للعودة
شوفنا حانطور
شريف طلب انه يركب الحانطور
وفعلا خدنا جولة بالحانطور احنا الاربعة
وخامسنا كان سواق الحانطور
قعدت انا وحمادة على الكنبة
وشريف كان قاعد وسطنا
وعسقول قعد جنب السواق
شريف قاللى مش شايف حاجة
راح عسقول واخده ومقعده على رجله
دار حديث مطول بين عسقول وشريف
عن اصوات الحيوانات
وشريف تقريبا قلد كل الاصوات
وعسقول علمه اسامى الاصوات
خلصنا الجولة
ونزلنا عند مكان العربية
ركبنا العربية فى اتجاهنا للبحر
وعند اول الشارع
لاقينا ايناس بتتصل بينا
عايزانا نرجع علشان الاخصائى الاجتماعى
عايز يستلم التلفزيون
وهى عايزة توزع البامبرز
على اولياء الامور اللى ولادهم بيعانوا من تبول لا ارادى
وفعلا رجعنا تانى
ولما دخلت الحديقة تانى
مجموعة من المدونين قالولى
كنتي فين ده احنا افتكرناكى مشيتى؟
قلتلهم كنت بتحنطر بالحانطور
مجموعة تانية سالتنى
اشتريتى التلفزيون
قلتلهم لا
فعلامات اليأس اترسمت على وشهم
وقالولى امال كنتى فين كل ده
قلتلهم كنت بتحنطر
قالولى يعنى ما اشتريتيش التلفزيون
قلتلهم يا جماعة التلفزيون متلئح فى العربية من يوم الاربع
فقالوا ااااااااااااه
يعنى انتى جايبة التلفزيون معاكى من القاهرة
قلتهم اه …هو فيه ايه؟
قالولى اصل الناس اعتقدوا انك رحتى تشتريه من هنا
لما اختفيتى انتى وعسقول وحمادة
الاخصائي الاجتماعى جه شال التلفزيون من العربية
وحمادة خرج الكرتونة من شنطة العربية
وجاءت رحلة تقفيل التلفزيون مرة اخرى
محمد راح جاب شريط لاصق عريض
وحمادة وعسقول اعادوا ترميم وهيكلة كرتونة التلفزيون
بعد ما كانت مطبقة ومدفوسة جوة شنطة العربية
والاخصائى الاجتماعى حط التلفزيون جواها
ومحمد قام بتقفيل الكرتونة بالشريط اللاصق
واذا فجأتن تخطر على بالي فكرة خلتنى اضحك
حمادة سالنى بتضحكى على ايه
قلتله
اصل بعد العذاب ده كله فى تقفيل التلفزيون
هيرجعوا يفكوه تانى
ويخرجوه من الكرتونة
قالى ليه
قلتله علشان يعرفوا يحطوه فى العربية اللى هاتنقله المدرسة
ومشينا اتجهنا الى مطعم سى ستار
وبعد ما خلصنا غدا
اتجهنا للبحر
وبعد كدة رجعنا القاهرة
مقتطفات من اليوم
وليد هى وظروفها
خس شوية
ماما امولة شخصية محترمة جدا و ودودة
وصوتها كان تعبان بسبب عملية اجرتها من حوالى 3 شهور
الف سلامة عليكى يا امولة
شريف كان مندمج جدا
مع امانى بنت ماما امولة وصديقتها روان
واحدة فى اول اليوم معرفش هى مين لحد دلوقتى
سالتنى باستغراب
هو ده شريف ابنك
قلتلها اه
سالتنى هو طالع ملون كدة لمين
قلتلها لباباه
بصتلى باندهاش وقالتلى
طب لما هو باباه ملون كدة اتطلقتى منه ليه؟
انا استغربت فى عقل بالى من السؤال الغريب
وقلتلها اصل انا كنت عايزاه ابيض واسود
داليا اهو ده عيبه
ودعاء ربع ضارب
الاتنين اخوات
والاتنين شكلهم ينفع توأم
رغم التلات سنين فرق اللى ما بينهم
البنتين هاديين جدا وشخصيتين محترمتين
نسمة
كانت عسولة يوميها
وكانت طول اليوم هى واصحابها
قاعدين فى اوضة عبارة عن مخزن مافيهوش اى تهوية
كانوا بيقسموا الحلويات والعصير
علشان يوزعوها على الاطفال
ايناس
كان مرتبة اليوم بشكل كويس ومنظم
وكانت عاملة زى النحلة يوميها
جزاكى الله خيرا يا ايناس
عربية الحانطور اللى ركبناها
قبل ما نركب علطول
لاقيت فيها عنكبوت كبير ملزوق فى الكنبة
ورجليه متفعصين
ورجل واحدة سليمة وعمالة تتحرك
انا قرفت اوى اوى اوى
وخفت جداااااااااااااااااااا
وخليت حمادة يشيل العنكبوت بمنديل
وخليته هو يقعد فى الجنب اللى كان فيه العنكبوت
نيهاهاهاهاهاهاهاهاهاهاهاع
عسقول
عمل مجسم لشكل مركب من فروع الاشجار
بابا ابو خالد
شرفنا بالحضور
رحت انده لشريف علشان يسلم علي بابا ابو خالد
وبقوله يا شريف تعالى سلم على جدو
ولسة هاقول اسم بابا ابو خالد
لاقيت شريف اشرئب براسه
وعنيه اتفتحت على مصراعيها
وقام من مكانه
وبيسالنى بلهفة هو جدو جمال رجع من عند ربنا ؟
انا جسمى قشعر من سؤاله
واستغبيت نفسى انى استخدمت مصطلح جدو
قلتله لا يا حبيبى
ده جدو تانى
شفقة واحسان
اتاخروا فى الحضور
رغم وجودهم فى بور سعيد من يوم الخميس
انا علقت تعليقات خيخية على تاخيرهم
وهما تقبلوا تعليقاتى الخيخية بصدر رحب وبضحكات ملعلعة
كنت لابسة تى شيرت احمر غامق
وجزمة نفس لون التى شيرت
احسان سالنى انتى اهلاوية؟
قلتله اه
قالى واضح انك اهلوية حتى الجزمة
عاجبنى التعليق وقعدت اضحك انا وعسقول وحمادة
خالد همس الاحباب
كان له رأي عاجبنى جدا
وقال ان المفروض التجمعات الخيرية ما تتسماش باسم حد
يعنى مثلا التبرع بالدم
مش معنى ان خيخة اللى بداته
ان ده معناه انى لو زعلان مع خيخة ما احضرهوش
لأن المفروض نفصل ما بين عمل الخير
وبين علاقاتنا الشخصية مع بعض
ولو حد زعلان من خيخة
ده ما يمنعهوش من حضور التبرع بالدم برضه
مطعم سى ستار
مكان كويس
الاكل اللى انا طلبته كان طعمه حلو
كان فيه بس مشكلة تاخير فى نزول الطلبات
فى مطعم سى ستار
اتعرفت على شخص اسمه احمد عبد الصمد
صاحب مدونة امى
شخص محترم
كان نفسى نقعد معاه وقت اطول
لكن كنا مستعجلين
وكنت عايزة اودى شريف البحر
البحر كان منظره مهيب
وخصوصا ان الدنيا كانت ليل
اول ما رحنا على البحر
لما اتمالك نفسى
ورحت قلعت الجزمة والشراب وشمرت البنطلون
ومشيت جوة المية
عسقول لما شافنى بقلع الجزمة
سالنى انتى هتنزلى المية يا خيخة
قلتله اه
راح قلع الجزمة والشراب هو كمان ونزل
حمادة شافنا كدة
راح قالع جزمته وشرابه ونزل هو كمان
ضياء رفض باستماتة انه يتخلى عن جزمته وشرابه
وفضل واقف على الشط هو وشريف
طبعا رغم تشمير البنطلونات
الا انها اتبلت برضه من موج البحر
شريف طلب انه هو كمان يحط رجله فى المية
فقلعته جزمته وشرابه وخليته يمشى فى المية شوية
كان فيه على الشط
ثنائى بشرى ملتصق التصاقا
لا يسمح بمرور الماء او الهواء او الضوء
من الاخر كدة كانوا حضنين بعض وعاملين يبوسوا فى بعض
ضياء استغل طوله وعمل ايشارات بايده للثنائى
وقال بعلو صوته
شايفك على فكرة
ولكن الثنائى لم ينفصل وفضلوا يكملوا بوس واحضان
حمادة وعسقول قعدوا يلموا قواقع
من على الشط
حمادة لم يحلو له انه يلم القواقع
الا من جنب الثنائى الملتصق
فى وسط اليوم
تلقيت اتصالات عديدة
من بعض المدونين والمدونات
وكلهم كانوا مستغربين بشدة حضورى لبور سعيد
وكانت هذه بعض تعليقاتهم
انتى بجد رحتى بور سعيد
يا بنت الايه يا خيخة اما صحيح ضربة معلم
انا مبسوطة انك رحتى
ولما قلت لبعضهم انى ماكنتش ناوية اروح
لكن عسقول اقنعنى بوجهة نظره
سالونى عن وجهة نظر عسقول
فلما قلتهالهم
اعجبوا بوجهة نظره
وقالولى عنده حق وكلامه صح جدا
رجعنا القاهرة فى ساعة وربع
ضياء وعسقول
استلموا حمادة تعليقات طول الطريق
بسبب السرعة اللى كان ماشى عليها حمادة
ضياء قعد يقول احنا ممكن نتقلب بالعربية
واحنا نطلع من العربية كويسين
والعربية هى اللى ما ترجعش سليمة
عسقول قال
احنا بالسرعة اللى ماشى عليها حمادة
ممكن نوصل لمكان ابعد
من القاهرة بكتيييييييييير
خلال لحظات
ومانرجعش تانى
حمادة قالهم لو ما سكتوش
هانزلكم على الطريق
شريف نام طبعا بعد خمس دقايق من ركوبه للعربية
شريف كان اصر انه يقعد جنب الشباك
وعسقول اتزنق فى النص ما بين ضياء وشريف
بعد فترة بطمن عليهم وببص ورا
لاقيت شريف واخد نص الكنبة لوحده وهو نايم
وعسقول وضياء مزنوقين فى النص التانى
بعد ما وصلنا القاهرة فى ساعة وربع
توهنا على الدائرى
وفضلنا نلف عليه حوالى ساعة لوحده
حمادة قال لعسقول وضياء
اهو قركم ده هو اللى خلانى اتوه
حمادة رفض باستماتة
انه يسال اى حد فين منزل البحر الأعظم
ولما سالته عن سبب رفضه
قاللى عايزة الناس تقول عليا انى غبى وحمار
مش عارف اقرا اليافطة؟
قلتله وانت فكرك اصرارك على انك ما تسالش حد
ده يخلينى اقول عليك ايه دلوقتى؟
حمادة ضحك وقاللى
انزلوا كلكم من العربية
وفى التمام الساعة الثانية عشر ليلا
وصلت الى بيتى المحندء الجميل
سالت شريف
اتبسطت النهاردة يا شريف؟
وفى سابقة تعد الاولى من نوعها
فى تاريخ شريف الترفيهى
قاللى ايوة يا مامى اتبسطت
وحمدت ربنا انه اخيرا اتبسط
لانه كان دائما وابدا
فى كل خروجة ترفيهية
ارجع اساله
مبسوط؟
يقولى لأ …. انا زعلان منك علشان خلتينى امشى بدرى؟
فلما قاللى انه اتبسط
اتأكدت تأكد لا مجال فيه للشك
ان الواد ده شوارعي
وبيحب يقضى اليوم كله برة البيت
بس خلاص
اليوم خلص على كدة
شكر لعسقول
اللى اقنعنى بالحضور
شكر لاصحابى اللى شجعونى على الحضور
شكر لايناس على مجهودها فى تنظيم اليوم
شكر لحمادة السواق
على تعبه معانا الفترة اللى فاتت
وتكبده مشقة وعناء توصيلنا الى بور سعيد
شكر خاص لفاعلة الخير
اللى سلمتنى التبرع المالى
واللى كلفتنى انى اشترى متطلبات المعاقين
شكر لشاهى ودعاء
على نزولهم معايا وانا بشترى الحاجات
شكر لكل اللى كلموني
بشكر كل اللى حضروا
واللى وجودهم كان سبب رئيسى فى انجاح اليوم
شكر لهانى انه وافق انى اخد معايا شريف
لان يوم الجمعة هو اليوم الاساسى المتفق عليه بينا
ان شريف يقضى اليوم معاه
توضيح امرين لا ثالث لهم
اول امر
اصريت فى البوست انى اجيب سيرة التلفزيون والبامبرز
لان كتير اعتقد ان انا اللى اشتريتهم من مالى الخاص
وده شئ غير صحيح بالمرة
انا كنت مجرد مكلفة بشرائهم وتوصيلهم لبور سعيد
والفضل يرجع لفاعلة الخير اللى اتبرعت بالمبلغ المالى
تانى امر
انا معنديش عربية خاصة
وحمادة السواق مش سواق عندى ولا عند اللى خلفونى
حمادة سواق على عربيته الخاصة
وهى دى شغلته اللى بيتكسب منها
انه يطلع بعربيته اى مشوار لاى حد
وحمادة جه وصلنى اكتر من مرة فى التجمعات الخيرية
وعلشان كدة بعض المدونين عارفينه
خارج نطاق البوست
ابى هانم بتنجانى سافرت بالسلامة
يوم الخميس اللى فات
الى الاراضى الكويتية
لبدء حياتها الزوجية مع زوجها الدكتور محمد
والحمد لله هى كويسة
ربنا يسعدهم يارب ويكرمهم
بس خلاص
سعدت بلقائكم
ويارب دايما متجمعين فى كل خير
انتهى
بت خيخة وأي كلام
| |
|
