بمناسبة أحداث مرسي مطروح الطائفية، اللي طبعاً الواحد خلاص بيبقي بيتعامل معاها بمنتهي البرود و عدم الإهتمام بسبب التعود، لأن لو عدي شهرين و مفيش مصادمات حصلت ما بين المسلمين و المسيحيين يبقي أكيد فيه حاجة غلط.. أحب أهديكم تقرير العطيفي بتاع سنة ١٩٧٢.. و اللي ميعرفش ايه هو تقرير العطيفي.. فببساطة أما حصلت أحداث الخانكة الطائفية سنة ١٩٧٢، ما كنش وقتها المجتمع متعود علي مثل هذه المصادمات و فقرر مجلس الشعب بناء علي طلب من الرئيس السادات بتشكيل لجنة برئاسة الدكتور جمال العطيفي لتقديم تقرير عن الأحداث و ايضاح الأسباب اللي أدت للتوترات الطائفية
تقرير العطيفي لخص أسباب المشاحنات الطائفية لسببين الترخيص باقامة الكانئس -  الدعوة و التبشير - 
و يقول العطيفي في التقرير

و قد تبينت اللجنة أن من أهم الأسباب التي تؤدي إلي الإحتكاك، و إثارة الفرقة عدم وضع نظام ميسر لتنظيم هذه التراخيص دون تطلب صدور قرار جمهوري في كل حالة و ذلك إن إستصدار هذا القرار يحتاج إلي وقت، و كثيراً ما تتغيير خلاله معالم المكان الذي أعد إلي اقامة الكنيسة، مثل أي يقام مسجداً قريباً يخل بالشروط العشرة

 و يقول العطيفي مجدداً في نهاية الفقرة

و من ثم فإن اللجنة تقترح  بإعادة النظر في نظام الترخيص بغية تبسيط اجراءاته علي أن تتقدم البطراخانة بخطتها السنوية لإقامة الكنائس لتدرسها الجهات المختصة دفعة واحدة بدلاً من أن تترك للمبادرة الفردية أو للجمعيات أو الأشخاص دون تخطيط علمي سليم

تقرير العطيفي


التقرير ده موجود في الأدراج من سنة ١٩٧٢ لحد  النهاردة و مفيش شخص في الدولة كان عنده الجرأة انه يطبق التوصيات اللي جائت فيه رغم بساطتها و كان زماننا و لا عندنا أحداث مرسي مطروح و لا نجع حمادي و لا ديروط و فرشوط و لا العياط
ملاحظة مش مهمة: ألف سلامة علي الريس و يا رب يرجعهلنا بالسلامة كده..  وجود الريس مهم جداً لمصر لأني مش متخيل لو هو مش موجود مين اللي هيقوم بالدور المهم في حراسة الملفات اللي موجودة من سنة ١٩٧٢ منغير ما ياخد أي قرار فيها؟