حكاية بنت الحارة



في غفلة من الزمان... ويا الف وستميت خسارة
إختلط الحابل بالنابل... والحثالات بالناس الكبّارة
وطلعت على وش الدنيا… جربوعة من قاع الحارة
كانت آخر ما تحلم بيه… شندوتش فول أو صحن بصارة

قالت يا بت أنزلي البندر… مين عارف أخرتها إيه العبارة
لو لعبتيها صح يمكن تتشهري… وتتغني وتبني لك عمارة
وشوية بويه علي وشك… ولا أكنك في الحقيقة صرصارة
وتلمي الفلوس بقى يا حلوة… في زكيبة ولا قفة ولا شكارة

ولو حد مش علي كيفك… أقلبي علية الأمارة
وماحدش حا ياخد باله منك… إن كنتي أونطجية أو معّارة
وطرطشي وقولي عليه كافر… أو عميل بيقبض من السفارة
الناس يمكن تصدّق… ويفتكروكي بالعفّة والشرف أمّارة

بيعي قلمك وعرضك للي يدفع أكتر… بس من ورا الستارة
يوم ليبرالية ويوم أخوانجية… أهو كده تبقى الشطارة
لحد مايجيلك عدلك الرابع… يلمك في بيتك يا سمارة
أو لحد ما تقعي يا شاطرة… ونجيلك القناطر يوم الزيارة

عملتي عملتك يا خايبة… وضحكوا عليكي بجدارة
والرايح والجاي بقي يقول... هبله ومسكوها زمارة
كنتي فاكرة انها حاتعدي… طلعت الدنيا زي الخيارة
أتاري فيه فرق كبير يا قطة… بين الصحافة وبين الدعارة

رباعيات الهلالي الحلمنتيشية
.