اول امبارح كنت فى القاهره فى مهمه مكوكيه من مهماتى السريه
من صباحيه ربنا و انا بالف فى الشوارع و الجو بصراحه كان تحفه جدا
ربنا ما يكتب على حد بيه ابدا
المهم خلصت مهمتى و رحت محطه القطر فى رمسيس و هناك
قابلت حبيبتى و صاحبتى الجميله فاتيما هانم ام يوسف
و كيارا هانم اللى كنت اول مره اشوفها و ان كنا بقينا اصحاب جدا من قبلها
البنت دى رقيقه قوى يا جماعه غالبا الرقاق فى بيتهم كتير قوى
ربنا يهنيكى يا كيارا و يحققلك كل اللى تتمنيه
يااااااااااااااارب
المهم بقى قعدنا فى ترابيزه على الجنب كده
و طلبنا اللى طلبناه ملكومش دعوه بقى هو ايه
و بدأنا نمسك الشوك و اتفضلى يا تيما ميرسى يا لولا
كلى يا كيارا لا انا عامله ريجيم
فجأه واحنا بناكل ظهرت ست منقبه من ورانا و حطت ايديها
على ظهرى انا و فاتيماو طبطبت علينا بكل حنان و رقه
انا و الله افتكرتها واحده من المدونات المنقبات و تعرف فاتيما
و لقيتها بتقولنا من حرام نبقى متدينين و مسلمين و بناكل بايدنا الشمال
طبعا انا اتخضيت لان انا قاعده جنب فاتيما و هيا جنبى
و محدش مننا خد باله ان التانى بياكل بالشمال
تقوم اللى قاعده فى اخر الكافتريا تاخد بالها
طبعا احنا استغربنا و سكتنا خاااااااالص
و كنت خلاص حاقولها يعنى الباشا الطويل العريض
اللى قاعده معاه ده مش مالى عينك و مركزه معانا احنا
يا جماعه و الله انا مليش دعوه بموضوع النقاب هنا خالص
انا باستغرب ان الناس بتنتهك خصوصيه بعض من غير مناسبه و لا سبب
و بعدين موضوع التحكم فى الشمال و اليمين ده بيبقى فى تكوين المخ
يعنى مالناش يد فيه و ممكن الواحد يتعلم ياكل باليمين و ممكن يفشل
كان ممكن نرد عليها و نحرجها زى ما احرجتنا
و ساعتها محدش كان حيلومنا
صح و لا انا غلطانه
لو غلطانه قولوا
| |
|
